Në kuadër të Programit Move Up, IFC dhe Dhoma Amerikane organizuan modulin e katërt të fokusuar në menaxhimin e transportit dhe shpërndarjes. Ky sesion synoi të forcojë aftësitë e pjesëmarrësve në planifikimin, menaxhimin dhe optimizimin e operacioneve të transportit dhe shpërndarjes.
I drejtuar nga trajnerja Cristina Radu, trajnimi u ofroi bizneseve njohuri praktike mbi përzgjedhjen e mënyrave më të përshtatshme të transportit, menaxhimin efikas të kostove si dhe sigurimin e dorëzimit në kohë dhe me kosto. Sesioni ndërthuri perspektivën operacionale dhe strategjike, duke ndihmuar pjesëmarrësit të kuptojnë më mirë se si të përmirësojnë performancën e shpërndarjes, të minimizojnë mungesën e efiçencës dhe të reagojnë në kohë dhe me cilësi ndaj pritshmërive në rritje të klientëve në tregje gjithnjë e më konkurruese.
Gjatë trajnimit u trajtuan tema kyçe, si:
- Strategjitë e përzgjedhjes së mënyrave të transportit (rrugor, hekurudhor, detar, ajror dhe ndërmodal)
- Menaxhimi i dërgesave dhe operatorëve të transportit
- Planifikimi dhe programimi i transportit
- Dizejnimi dhe menaxhimi i rrjeteve të shpërndarjes
- Teknologjitë e menaxhimit të transportit
- Treguesit kyç të performancës në transport dhe shpërndarje
- Pritshmëritë e shërbimit ndaj klientit, veçanërisht në përmbushjen e porosive dhe performancën e dorëzimit
Ky modul synoi të pajisë pjesëmarrësit me mjete praktike dhe njohuri për ndërtimin e sistemeve më të besueshme, fleksibël dhe efikase të transportit dhe shpërndarjes. Gjithashtu, ai kontribuoi në përmirësimin e vendimarrjes dhe rritjen e cilësisë së shërbimit përgjatë gjithë zinxhirit të furnizimit.
Në veçanti, trajnimi ofroi njohuri të vlefshme për operimin në tregun e Bashkimit Europian, ku konkurrenca është e fortë dhe përputhshmëria me rregulloret është thelbësore. Duke forcuar këto kompetenca, pjesëmarrësit janë më të përgatitur për të përballuar sfidat e tregut dhe për të rritur performancën e tyre operacionale.
