Diskutimi u fokusua në partneritetin strategjik dhe avancimin e investimeve amerikane
Bordi i Drejtorëve i Dhomës Amerikane të Tregtisë në Shqipëri zhvilloi një drekë pune me të Ngarkuarën me Punë të SHBA-së, znj. Nancy VanHorn, në një diskutim të hapur dhe konstruktiv mbi prioritetet kryesore që ndikojnë në mjedisin e biznesit në Shqipëri.
Takimi u zhvillua në vijim të angazhimeve që synojnë forcimin e mëtejshëm të partneritetit mes AmCham dhe Ambasadës së SHBA-së, si dhe përforcimin e objektivit të përbashkët për avancimin e marrëdhënieve ekonomike midis Shqipërisë dhe Shteteve të Bashkuara.
Në mbështetje të këtij objektivi, Bordi i AmCham vendos theks të veçantë në prioritetet e tij kryesore të advokimit, të përqendruara në përmirësimin e klimës së biznesit dhe forcimin e kuadrit rregullator. Përmes komiteteve të tij sektoriale aktive, AmCham promovon reforma që lidhen me parashikueshmërinë rregullatore dhe fiskale, inovacionin, sigurinë, qëndrueshmërinë dhe sfidat specifike sektoriale, si në sektorët digjital, të shëndetësisë dhe turizmit.
Theks i veçantë iu kushtua efektivitetit të procesit të konsultimit publik. Bordi nënvizoi nevojën për krijimin e një mekanizmi konsultimi të strukturuar dhe funksional që siguron dialog kuptimplotë, transparencë dhe reagim institucional të argumentuar. Forcimi i përfshirjes së palëve të interesuara është thelbësor për ndërtimin e besimit dhe për të siguruar që reformat ligjore dhe rregullatore të jenë të balancuara, të parashikueshme dhe të zbatohen në mënyrë efektive.
Në kuadrin më të gjerë të diskutimeve mbi klimën e investimeve, u theksua rëndësia e krijimit të një mjedisi biznesi gjithnjë e më tërheqës dhe konkurrues për kompanitë e mëdha ndërkombëtare, përfshirë investitorët amerikanë. Diskutimi trajtoi gjithashtu mekanizmin e shqyrtimit të investimeve si një instrument të rëndësishëm në kontekstin e sigurisë kombëtare dhe investimeve strategjike. AmCham rikonfirmoi qëndrimin e saj se forcimi i kuadrit të investimeve në Shqipëri duhet të përqendrohet në ndërtimin dhe promovimin e procedurave transparente, efikase dhe të parashikueshme për investitorët e huaj. Garantimi i sigurisë ligjore dhe qartësisë rregullatore mbetet thelbësor për rritjen e besimit të investitorëve dhe për pozicionimin e Shqipërisë si një destinacion i besueshëm për investime ndërkombëtare cilësore.
Dreka e punës rikonfirmoi partneritetin strategjik afatgjatë midis AmCham dhe Ambasadës së SHBA-së. Mesazhi i përbashkët ishte i qartë: avancimi i sigurisë ligjore, forcimi i dialogut institucional dhe promovimi i procedurave transparente dhe të parashikueshme janë thelbësore për tërheqjen e investimeve ndërkombëtare cilësore, nxitjen e inovacionit dhe mbështetjen e zhvillimit të qëndrueshëm ekonomik të Shqipërisë.
