Si një organizatë e përkushtuar për të çuar më tej zhvillimin e marrëdhënieve të biznesit midis SHBA-së dhe Shqipërisë, AmCham e konsideron përshtatjen dhe promovimin e standardeve të biznesit të drejtë dhe etik dhe të bashkëveprimit të mirë qytetar si qëllime kryesore në punën dhe bashkëveprimin e saj me të tjerët. AmCham merr një rol aktiv dhe udhëheqës në promovimin e praktikave më të mira amerikane drejt komunitetit të biznesit që vepron në Shqipëri duke miratuar këtë Kod të parimeve dhe praktikave më të mira të biznesit. Kodi duhet të përdoret nga AmCham dhe bizneset e saj anëtare në çdo aspekt të operacioneve të tyre:

Bizneset Anëtare duhet të respektojnë sundimin e ligjit në angazhimet e tyre me qeverinë: Të respektojnë ligjet dhe rregulloret dhe t'i përmbahen sundimit të ligjit; Të përmbahen nga angazhimi në çdo aktivitet tjetër që mund të interpretohet si korruptiv ose në shkelje të ligjit; Të përmbahen nga përpjekja për të ndikuar në ndonjë interes përmes shkëmbimit të dhuratave, parave ose informacionit; Të përmbahen nga kërkimi i trajtimit të veçantë bazuar në përdorimin e papërshtatshëm të marrëdhënieve personale gjatë kryerjes së aktiviteteve profesionale.

Bizneset Anëtare duhet të angazhohen në praktika të drejta dhe etike biznesi: Të zbatojnë ligjin në ushtrimin e aktivitetit të tyre biznesor dhe të zhvillojnë biznesin në mënyrë transparente; Të mos pranojnë dhe as të mos ofrojnë asnjë formë ryshfeti gjatë kryerjes së biznesit; Të përmbahen nga dhënia e informacionit të rremë ose mashtrues dhe të përfaqësojnë veten me ndershmëri në diskutime dhe negociata; Të zbatojnë praktika biznesi të përgjegjshme ndaj mjedisit.

Bizneset anëtare duhet të ofrojnë një mjedis pune të sigurt dhe etik: Të garantojnë trajtim të drejtë të të gjithë punonjësve dhe të tregojnë respekt për individin dhe dinjitetin e punëtorit; Të ofrojnë një mjedis pune të sigurt dhe të shëndetshëm në vendin e punës; Të mos tolerojnë përvetësimin ose përfitimin; Punonjësit duhet të përmbahen nga angazhimi në sjellje ose aktivitete që mund të kompromentojnë padrejtësisht reputacionin e një punonjësi tjetër në kompani; Punonjësit duhet të sillen në një mënyrë të tillë që i sjell nder dhe respekt organizatës.

Bizneset anëtare duhet të luajnë një rol aktiv në komunitet: Të veprojnë me përgjegjësi dhe të demonstrojnë një angazhim për përparimin e komunitetit përmes promovimit të arsimit, shëndetit, aktiviteteve kulturore dhe aktiviteteve të tjera; Sa herë që është e mundur, të inkurajojnë punonjësit të japin kontributin e tyre në komunitet duke ofruar vullnetarisht kohën ose burimet e tyre.