Dhoma Amerikane mirëpriti në një takim njohës dhe informues studentë të ekselencës të vitit të dytë në Universitetin e Cincinnatit, Shkolla e Biznesit Carl H. Lindner, USA të organizuar nga International Study Programs. Albana Karapanço Kryetare e Komitetit Ligjor dhe Pronësisë Intelektuale, zhvilloi një bisedë me pedagogët dhe studentët e Universitetit të Cincinnati duke prezantuar punën që bën Dhoma Amerikane përmes Komiteteve në përmirësimin e klimës së biznesit dhe investimeve në vend.
Diskutimi preku tema të zhvillimit ekonomik, sektorëve prioritarë, interesit të investitorëve të huaj dhe mënyrën se si Shqipëria po përparon në procesin e njehësimit të legjislacionit me BE.
Qëllimi i udhëtimit të studentëve të Cincinnati në Shqipëri është të prezantohen nëpërmjet takimeve dhe informacioneve që marrin me ndryshimet që sjellin mjediset sociale, politike, ligjore dhe financiare në vendimarrjet e ekzekutivëve në biznes dhe mënyrën se si ata përballojnë sfidat e përditshme. Dhoma Amerikane në eksperiencën e saj 25 vjeçare si organizatë biznesi dhe rolin që ka luajtur në formësimin e politikave që afektojnë klimën e biznesit, ishte vendi i duhur për të zhvilluar një diskutim interesant me studentët.
